Revelation of John 11
Nia daangada haga modongoohia dogolua
1Di laagau ne gaamai gi di au e hai be di laagau hagatau mee, gei mee ga helekai mai, “Hana hagatau ina di Hale Daumaha a God mo dono gowaa dudu tigidaumaha. Daulia digau ala e daumaha i lodo di Hale Daumaha. a 2Malaa, hudee hagatau ina nia gowaa ala i di baahi gi tua, idimaa, ma gu wanga gi digau tuadimee, go digau ala ga dagadagahi di waahale haga madagu i lodo nia malama e madahaa maa lua. b 3Au ga hagau agu daangada hagi aga mee dogolua ala e ulu nia gahu lodo huaidu, gei meemaa ga haga iloo nnelekai kokohp a God i lodo nia laangi e mana maa lua lau modoono(1,260).” 4Nia daangada hagi aga mee dogolua la go nia laagau olib e lua mo nia malama e lua ala e tuu i mua di Tagi o henuailala. c 5Maa tangada ma ga helekai bolo ia e hagaduadua meemaa, di ahi ga hanimoi i lodo nau ngudu, ga daaligi nau hagadaumee. Deenei di hai e daaligi ai gi made tangada dela bolo ia e hagaduadua meemaa. 6Meemaa nau mogobuna e tai di langi gi dee doo di ua i lodo nau madagoaa ala e haga iloo nnelekai kokohp a God. Meemaa nau mogobuna labelaa i nia wai, e huli nia wai gi hai nia dodo. Meemaa nau mogobuna labelaa e hagaduadua henuailala i nia holongo ala e hiihai ginai meemaa. d 7Nau madagoaa ma ga lawa di haga iloo nau helekai, di manu hagamadagudagu dangada dela e hanaga i lodo di lua dono dua ai, la ga heebagi gi meemaa. Gei mee ga haga magedaa meemaa, ga daaligi meemaa gi mmade. e 8Gei nau huaidina la ga mmoe hua i hongo di ala o di waahale deelaa, di gowaa dela ne daudau ai di nau Dagi. Di ingoo hagatautau o di waahale la go Sodom, be go Egypt. f 9Nia daangada mai nia henua llauehe, madawaawa, nia hagadilinga helekai, mo nia hagadilinga daangada henua huogodoo, la ga mmada gi nau huaidina i lodo nia laangi e dolu mo di baahi, gei digaula hagalee dumaalia gi tangada e dahi e danu meemaa. 10Nia daangada henuailala gu tentene gi nau mmade. Digaula ga budu mo di hai nadau wanga dehuia i nadau mehanga, idimaa, nia soukohp dogolua aalaa gu hai nau hagaduadua e logo gi digau henuailala. 11I muli nia laangi e dolu mo di baahi, gei di mouli mai i baahi o God ga ulu gi lodo meemaa, gei meemaa ga tuu i-nua, gei nia daangada huogodoo ala ne mmada gi meemaa la gu mmaadagu huoloo. g 12Gei nia soukohp dogolua ga longono di lee e helekai mai di langi gi meemaa, “Lloo aga gi kinei!” Meemaa ga hula gi di langi i lodo di gololangi, gei nau hagadaumee nogo daumada meemaa. h 13Di madagoaa hua deelaa, gei tenua gu ngalungalua, dahi baahi e madangaholu o di waahale gu mooho, nia daangada e hidu mana(7,000) la gu mmade. Nia daangada ala ne dubu, la gu mmaadagu huoloo, ga hagaamu nia mahi di God o di langi. i 14Di lua hagamadagudagu dangada la gu lawa, gei di tolu hagamadagudagu dangada la ga limalima hua dono dau.Di hidu buu-‘trumpet’
15Togohidu dangada di langi ga ili dana buu-‘trumpet’. Gei nia lee llauehe gu i-lodo di langi, e helekai, “Di mogobuna dela e dagi henuailala la gu hai di mee ni Dimaadua mo dana Messiah, gei mee ga dagi ga hana hua beelaa!” j 16Digau mmaadua aamua e madalua maa haa ala e noho i hongo nadau lohongo aamua i mua o God, ga pala gi lala ga daumaha ang gi God, 17ga helekai,“Dimaadua go di God Aamua Huoloo, go di God dela i golo, mo dela nogo i golo! Gimaadou e danggee adu gi di goe, bolo goe dela gu kae doo mogobuna maaloo, gei gu daamada gu dagi! 18Digau digi maalama la gu hagawelewele huoloo, idimaa, di madagoaa o doo hagawelewele la gu dau mai, go di madagoaa e hagi aga digau ala ne mmade. Di madagoaa la gu dae mai e wanga nia hui gi au gau hai hegau go nia soukohp, mo au daangada huogodoo mo nia daangada ala nogo hagalaamua doo ingoo, digau lligi mo digau aamua. Di madagoaa la gu dae mai e hagahuaidu digau ala nogo hagahuaidu henuailala!” k
19Di Hale Daumaha o God dela i di langi la gu huge, gei Tebedebe o di Hagababa la gu gidee bolo i golo. Gei di ila gu dabadaba, nia lee atili gu haluihalulu, henuailala gu ngalungalua ge di ua hadu kolii gu doo. l
Copyright information for
KPG